ମହୁଲ ଫୁଲ ପରେ ଟୋଲ ମଞ୍ଜି ସଂଗ୍ରହରେ ବ୍ୟସ୍ତ ଉପାନ୍ତ ଅଞ୍ଚଳବାସୀ।

ଝରିଗାଁ ,୭l୬ (ଷ୍ଟାର ନିୟୁଜ ଓଡିଶା ): ବନାଞ୍ଚଳବାସୀଙ୍କ ଜୀବନଜୀବିକା ହେଉ କି ଅର୍ଥ ରୋଜଗାରର ଉତ୍ସ୍ ହେଉ ଜଙ୍ଗଲଜାତ ଫଳମୂଳ,କନ୍ଦ,କୋଳି , ଶାଳ, ହରିଡ଼ା ବାହାଡା ସାହାଡ଼ା,କେନ୍ଦୁ, ଚାହାଁର, ଅଁଳା, ଲାଖ, ଝୁଣା,ଛତୁ ମହୁଲ ଟୋଲ ଆଦି ଲଘୁ ବନଜାତ ଦ୍ରବ୍ୟ ସଂଗ୍ରହ ଓ ବିକ୍ରୟ କରି ଅଞ୍ଚଳବାସୀ ଅର୍ଥ ରୋଜଗାର କରି ଆସୁଛନ୍ତି। ଗ୍ରୀଷ୍ମ ଋତୁରେ ମହୁଲ ଗଛ ଭଳି ଗୋଟିଏ ଗଛରୁ ଦୁଇଥର ଲାଭ ପାଉଛନ୍ତି ଗ୍ରାମାଞ୍ଚଳରେ ରହିଥିବା ଗ୍ରାମବାସୀ। କୃଷି ଉପରେ ନବେ ପ୍ରତିଶତ ଲୋକ ନିର୍ଭର କରି ଆସୁଥିବା ବେଳେ ଜଙ୍ଗଲ ଓ ଜଙ୍ଗଲ ଜାତ ଦ୍ରବ୍ୟ ଉପରେ ମଧ୍ୟ ନିର୍ଭର କରୁଛନ୍ତି। ଜଙ୍ଗଲ ପରିମାଣ ଦୁଇ ଦଶନ୍ଧି ମଧ୍ୟରେ ଅହେତୁକ ମାତ୍ରାରେ ଏହାର ଘନତ୍ଵ କମିଥିଲେ ମଧ୍ୟ ଆମ୍ବ,ତେନ୍ତୁଳି ମହୁଲ,କୁସୁମ, କେନ୍ଦୁ ଭଳି ଅନେକ ବୃକ୍ଷକୁ ସୁରକ୍ଷା କରି ରଖିଛନ୍ତି ଲୋକେ। ପ୍ରାକୃତିକ ଭାବେ ସୃଷ୍ଟି ହୋଇଥିବା ଅର୍ଥକାରୀ ଗଛ ମଧ୍ୟରେ ମହୁଲ ଗଛର ପ୍ରାଧ୍ୟାନ୍ୟତା ଭିନ୍ନ ରହିଛି। କେତେକ ଗଛ ବ୍ୟକ୍ତିଗତ ଅଧିକାରରେ ରହିଥିବା ବେଳେ ଜଙ୍ଗଲରେ ରହିଥିବା ଗଛ ଗୁଡ଼ିକରୁ ସର୍ବସାଧାରଣ ଲୋକ ଯାଇ ମହୁଲ ଟୋଲ ସଂଗ୍ରହ କରିଥାନ୍ତି। ବର୍ଷକୁ ଏହା ଦୁଇଥର ଅର୍ଥ ରୋଜଗାର କରିବାର ସୁଯୋଗ ଦେଇଥାଏ। ଗ୍ରୀଷ୍ମର ମଧ୍ୟ ଭାଗରେ ମହୁଲ ଫୁଲ ସଂଗ୍ରହ କରୁ କରୁ ଗ୍ରୀଷ୍ମ ଶେଷ ଆଡ଼କୁ ଟୋଲ ମଞ୍ଜି ଉତ୍ପାଦନ ହୋଇଥାଏ। ତେଣୁ ଝରିଗାଁ ବ୍ଲକର ବିଭିନ୍ନ ଅଞ୍ଚଳରେ ଟୋଲ ସଂଗ୍ରହର ଦୃଶ୍ୟ ଦେଖିବାକୁ ମିଳୁଛି।ବିଶେଷ କରି ଚକଲାପଦର, ସାନ ଟେମରା, ଚଚା,ଫୁପୁ ଗାଁ,ପାଲିଆ,ଇଚ୍ଛାପୁର,ତେଲନଦୀ ପଞ୍ଚାୟତ ଆଦି ଅଞ୍ଚଳରେ ମହୁଲ ଗଛର ପରିମାଣ ଅଧିକ ରହିଛି। ଗ୍ରାମର ମହିଳା ପୁରୁଷ ଯୁବକ ଯୁବତୀ ଛୋଟ ବଡ଼ ପିଲା ଟୋଲ ମଞ୍ଜି ସଂଗ୍ରହ ରେ ବ୍ୟସ୍ତ । ସକାଳୁ ଥରେ ଓ ଅପରାହ୍ନରେ ଥରେ ଗଛ ମୂଳରେ ପଡିଥିବା ଟୋଲ ମଞ୍ଜି ସଂଗ୍ରହ କରିଥାନ୍ତି। ସଂଗ୍ରହ ପରେ ଏହାକୁ ଆଣି ପରିଷ୍କାର ଭୂଇଁରେ ଶୁଖାଇ ଥାନ୍ତି। କିଛିଦିନ ଖରାରେ ଶୁଖିଲା ପରେ ମଞ୍ଜିକୁ ପେଶି ତେଲ କାଢି ଥାନ୍ତି। ଆବାହନ କାଳରୁ ବାନାଞ୍ଚଳବାସୀ ଏହାର ଫୁଲରେ ଦେଶୀ ମଦ ପ୍ରସ୍ତୁତ କରୁଥିବା ବେଳେ ଏହାର ଟୋଲ ମଞ୍ଜିରୁ ତେଲ କାଢି ବ୍ୟବହାର କରନ୍ତି। ପୂର୍ବରୁ ଟୋଲ ତେଲରେ ପିଠା ତରକାରୀ ଆଦି ପ୍ରସ୍ତୁତିରେ ବ୍ୟବହାର କରି ଆସୁଥିଲେ। ଏବେ ମଧ୍ୟ କିଛି ଗରିବ ପରିବାରରେ ଏହି ତେଲକୁ ବ୍ୟଞ୍ଜନରେ ବ୍ୟବହାର କରୁଛନ୍ତି। ଏହି ତେଲରେ ଔଷଧୀୟ ଗୁଣ ଭରପୁର ରହିଛି। ଚର୍ମ ରୋଗ ପାଇଁ ବେଶ ଭଲ କାମ କରିଥାଏ। ଟୋଲ ମଞ୍ଜି ରୁ ତେଲ ପେଡିବା ପରେ ଅବଶିଷ୍ଟ ମଞ୍ଜିର ଅଂଶ ବା ବର୍ଜ୍ୟ ପଦାର୍ଥକୁ ଆଞ୍ଚଳିକ ଭାଷାରେ ଟୋଲା ପେଣ୍ଡି ବୋଲି କୁହାଯାଇଥାଏ। ଯାହାକି ଶରୀରରେ କୌଣସି କିତପଟଙ୍ଗ ଦଂଶନ,ଝିଟିପିଟି ଶରୀର ଉପରେ ପରିସ୍ରା କଲେ, ବୁଢିଆଣୀ ପରିସ୍ରା କଲେ ସେଥିରୁ ହୋଇଥିବା ସଂକ୍ରମିତ କ୍ଷତରେ ଏହି ଟୋଲା ପେଣ୍ଡୀକୁ ଜାଳି ଏହାର ଧୁଆଁ ସଂସ୍ପର୍ଶରେ ରହିଲେ ଘା ଶୀଘ୍ର ସୁସ୍ଥ ହୋଇଥାଏ। ପୁଣି କୃଷି କ୍ଷେତ୍ରରେ ବିଶେଷକରି ଧାନ ଚାଷରେ ଦେଖାଯାଇଥିବା କାଣ୍ଡବିନ୍ଧା ରୋଗର ପ୍ରତିକାର ପାଇଁ ଏହାର ପେଣ୍ଡି କ୍ଷେତରେ ପକା ଯାଇଥାଏ। ବଜାର ଦର କିଲୋ ପ୍ରତି 10 ରୁ 20 ଟଙ୍କା ମଧ୍ୟରେ ରହିଛି। ତେଣୁ ଏହା ବାନାଞ୍ଚଳବାସୀଙ୍କ ପାଇଁ ପ୍ରକୃତିର ବରଦାନ ବୃକ୍ଷ ଭାବେ ଜୀବନ ଜୀବିକା ସହିତ ଯୋଡି ହୋଇରହିଛି ଆଦ୍ୟରୁ ମହୁଲ ଗଛ ଏବଂ ଏହାର ଫୁଲ ଓ ବୀଜ।

ନବରଙ୍ଗପୁରରୁ ସ୍ୱତନ୍ତ୍ର ପ୍ରତିନିଧି ସବ୍ୟସାଚୀ ଭରତିଆଙ୍କ ରିପୋର୍ଟ |