କଳାହାଣ୍ଡିରେ ଚୋରଙ୍କ ଆତଙ୍କ: ରୁପ୍ରାରୋଡ଼ର ଜ୍ୱେଲେରୀ ଦୋକାନରେ ଚୋରି, CCTVରେ କଏଦ ହେଲେ ତିନି ଦୁର୍ବୃତ୍ତ

କେସିଙ୍ଗା/ରୁପ୍ରାରୋଡ଼, ୧୩.୦୭ (ଷ୍ଟାର ନ୍ୟୁଜ ଓଡ଼ିଶା): କଳାହାଣ୍ଡି ଜିଲ୍ଲାରେ ଦିନକୁ ଦିନ ଚୋରି ଘଟଣା ବଢ଼ୁଥିବାରୁ ସାଧାରଣ ଲୋକ ଓ ବ୍ୟବସାୟୀଙ୍କ ମଧ୍ୟରେ ଚିନ୍ତା ବଢ଼ିଛି। ସୋମବାର ରୁପ୍ରାରୋଡ଼ ଅଞ୍ଚଳର ଏକ ଜ୍ୱେଲେରୀ ଦୋକାନରେ ଘଟିଥିବା ଚୋରି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
ମିଳିଥିବା ସୂଚନା ଅନୁଯାୟୀ, ତିନିଜଣ ଦୁର୍ବୃତ୍ତ ଦୋକାନ ଭିତରକୁ ପ୍ରବେଶ କରି ସୁଯୋଗର ସଦ୍ବ୍ୟବହାର କରି ମୂଲ୍ୟବାନ ସାମଗ୍ରୀ ଚୋରି କରିଥିଲେ। ସମଗ୍ର ଘଟଣା ଦୋକାନରେ ଲାଗିଥିବା CCTV କ୍ୟାମେରାରେ ସ୍ପଷ୍ଟ ଭାବେ କଏଦ ହୋଇଥିବା ବେଳେ, ଚୋରମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ।
ଘଟଣା ସମ୍ପର୍କରେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। CCTV ଫୁଟେଜକୁ ଆଧାର କରି ଅଭିଯୁକ୍ତମାନଙ୍କ ଚିହ୍ନଟ ଓ ଗିରଫ ପାଇଁ ତଦନ୍ତ ଜୋରଦାର କରାଯାଇଥିବା ସୂଚନା ମିଳିଛି।
ଏପରି ଘନଘନ ଚୋରି ଘଟଣାକୁ ନେଇ ସ୍ଥାନୀୟ ବ୍ୟବସାୟୀମାନେ ଉଦ୍ବେଗ ପ୍ରକାଶ କରିବା ସହ ରାତ୍ରିକାଳୀନ ପାଟ୍ରୋଲିଂ ବୃଦ୍ଧି ଏବଂ ଦୋଷୀମାନଙ୍କୁ ଶୀଘ୍ର ଗିରଫ କରିବା ପାଇଁ ପୋଲିସ ପ୍ରଶାସନଙ୍କ ନିକଟରେ ଦାବି କରିଛନ୍ତି।