ମାଁ ମାଣିକେଶ୍ୱରୀ ବିଶ୍ୱବିଦ୍ୟାଳୟରେ SVEEP ଅଭିଯାନ: ଯୁବ ଭୋଟରଙ୍କୁ ମିଳିଲା ନିର୍ବାଚନ ସଚେତନତାର ବାର୍ତ୍ତା

ଭବାନୀପାଟଣା, ୪l୮(ଷ୍ଟାରନ୍ୟୁଜ ଓଡ଼ିଶା): ଯୁବପିଢ଼ିଙ୍କୁ ଗଣତାନ୍ତ୍ରିକ ପ୍ରକ୍ରିୟା ସହ ଯୋଡ଼ିବା ଓ ସଠିକ ଭୋଟର ତାଲିକା ପ୍ରସ୍ତୁତି ପ୍ରତି ସଚେତନ କରିବା ଉଦ୍ଦେଶ୍ୟରେ କଳାହାଣ୍ଡି ଜିଲ୍ଲାର ମାଁ ମାଣିକେଶ୍ୱରୀ ବିଶ୍ୱବିଦ୍ୟାଳୟ ପରିସରରେ ସୋମବାର SVEEP (Systematic Voters' Education and Electoral Participation) ସଚେତନତା କାର୍ଯ୍ୟକ୍ରମ ସଫଳତାର ସହ ଆୟୋଜିତ ହୋଇଛି। ୮୦-ଭବାନୀପାଟଣା ବିଧାନସଭା ନିର୍ବାଚନମଣ୍ଡଳୀ ଅଧୀନରେ ନିର୍ବାଚନ ସାକ୍ଷରତା କ୍ଲବ୍‌ ମାଧ୍ୟମରେ ଏହି ଜନସଚେତନତା ଅଭିଯାନ ପରିଚାଳିତ ହୋଇଥିଲା।

କାର୍ଯ୍ୟକ୍ରମରେ କଳାହାଣ୍ଡିର ଅତିରିକ୍ତ ଜିଲ୍ଲାପାଳ ତଥା ଅତିରିକ୍ତ ଜିଲ୍ଲା ନିର୍ବାଚନ ଅଧିକାରୀ, ଭବାନୀପାଟଣା ଉପ-ଜିଲ୍ଲାପାଳ ତଥା ନିର୍ବାଚନ ପଞ୍ଜୀକରଣ ଅଧିକାରୀ, ବିଶ୍ୱବିଦ୍ୟାଳୟର ରେଜିଷ୍ଟ୍ରାର, ଡେପୁଟି କଲେକ୍ଟର (ନିର୍ବାଚନ), ଜିଲ୍ଲା ସଂସ୍କୃତି ଅଧିକାରୀଙ୍କ ସମେତ ଉପ-ଜିଲ୍ଲାପାଳ କାର୍ଯ୍ୟାଳୟର ବହୁ ଅଧିକାରୀ ଉପସ୍ଥିତ ରହି ଛାତ୍ରଛାତ୍ରୀଙ୍କୁ ନିର୍ବାଚନ ସମ୍ପର୍କିତ ବିଭିନ୍ନ ତଥ୍ୟ ଅବଗତ କରାଇଥିଲେ।

ଏହି ଅବସରରେ ଚଳିତ SIR–୨୦୨୬ କାର୍ଯ୍ୟକ୍ରମର ଉଦ୍ଦେଶ୍ୟ, ତ୍ରୁଟିମୁକ୍ତ ଓ ସମାବେଶୀ ଭୋଟର ତାଲିକାର ଆବଶ୍ୟକତା ଏବଂ ପ୍ରତ୍ୟେକ ଯୋଗ୍ୟ ନାଗରିକଙ୍କ ନାମ ଭୋଟର ତାଲିକାରେ ସାମିଲ କରିବାର ଗୁରୁତ୍ୱ ସମ୍ପର୍କରେ ବିସ୍ତୃତ ସଚେତନତା ସୃଷ୍ଟି କରାଯାଇଥିଲା। ୧୮ ବର୍ଷ ବୟସ ପୂରଣ କରିଥିବା ଯୁବକ-ଯୁବତୀମାନଙ୍କୁ ECI Net ଆପ୍‌ ବ୍ୟବହାର କରି ସହଜରେ ଭୋଟର ଭାବେ ପଞ୍ଜୀକୃତ ହେବାକୁ ପ୍ରୋତ୍ସାହିତ କରାଯାଇଥିଲା।

ଏହାସହ SVEEP ଅଧୀନରେ ଆୟୋଜିତ ରଚନା, ବକ୍ତୃତା, କୁଇଜ୍‌ ଓ ଅନ୍ୟାନ୍ୟ ଭୋଟର ସଚେତନତା ପ୍ରତିଯୋଗିତା ସମ୍ପର୍କରେ ଛାତ୍ରଛାତ୍ରୀଙ୍କୁ ସୂଚନା ପ୍ରଦାନ କରାଯାଇଥିଲା। ଗଣତନ୍ତ୍ରରେ ଯୁବ ଭୋଟରଙ୍କ ସକ୍ରିୟ ଅଂଶଗ୍ରହଣ ଦେଶର ସୁଦୃଢ଼ ନିର୍ବାଚନ ବ୍ୟବସ୍ଥାର ମୂଳ ଆଧାର ବୋଲି ବକ୍ତାମାନେ ମତ ପ୍ରକାଶ କରିଥିଲେ।

ଏହି ସଚେତନତା ଅଭିଯାନ ମାଧ୍ୟମରେ ପ୍ରଥମ ଥର ଭୋଟ ଦେବାକୁ ଯାଉଥିବା ଯୁବପିଢ଼ିଙ୍କ ମନରେ ନିର୍ବାଚନ ପ୍ରତି ଦାୟିତ୍ୱବୋଧ ସୃଷ୍ଟି କରିବା ସହ ସୁସ୍ଥ ଓ ସଶକ୍ତ ଗଣତନ୍ତ୍ର ଗଠନର ବାର୍ତ୍ତା ପହଞ୍ଚାଇବା ଉପରେ ବିଶେଷ ଗୁରୁତ୍ୱ ଦିଆଯାଇଥିଲା।