କେସିଙ୍ଗା NACରେ ଜନସେବା ନା ମୁହଁଦେଖା କାରବାର? ଅଭିଯୋଗର ପାହାଡ଼, ଅଧିକାରୀଙ୍କ ନିକଟରେ ଉତ୍ତର ଖୋଜୁଛନ୍ତି ସାଧାରଣ ଲୋକ

କେସିଙ୍ଗା, ୧୦l୯(ଷ୍ଟାରନିୟୁଜ ଓଡିଶା )କେସିଙ୍ଗା NACରେ ସାଧାରଣ ଲୋକଙ୍କ ସମସ୍ୟା କେତେଦୂର ଶୁଣାଯାଉଛି? ଜନସାଧାରଣଙ୍କ ଅଭିଯୋଗ ଓ ଅସନ୍ତୋଷକୁ ନେଇ ଏବେ ଏହି ପ୍ରଶ୍ନ ଉଠିଛି। ବାରମ୍ବାର NAC କାର୍ଯ୍ୟାଳୟକୁ ଦୌଡ଼ିଲେ ମଧ୍ୟ ଅନେକ ସମସ୍ୟାର ସମାଧାନ ହେଉନଥିବା ଅଭିଯୋଗ ହେଉଛି। ଅଭିଯୋଗକାରୀଙ୍କ କହିବା ଅନୁଯାୟୀ, ଗୋଟିଏ ବିଭାଗ ଅନ୍ୟ ବିଭାଗକୁ ଦାୟୀ କରୁଥିବାରୁ ସାଧାରଣ ଲୋକ ନିଜ ସମସ୍ୟା ନେଇ କାହା ପାଖକୁ ଯିବେ, ତାହା ନେଇ ଦ୍ୱନ୍ଦ୍ୱରେ ପଡ଼ୁଛନ୍ତି।
ସରକାରୀ ତଥ୍ୟ ଅନୁସାରେ NACର ମୂଳ ଦାୟିତ୍ୱ ହେଉଛି ସହରବାସୀଙ୍କ ସ୍ୱାସ୍ଥ୍ୟ, ପରିମଳ, ପାନୀୟଜଳ, ରାସ୍ତା, ନିରାପତ୍ତା ଓ ଜନସୁବିଧା ସୁନିଶ୍ଚିତ କରିବା।  ତେବେ ଭୂମିସ୍ତରରେ ଏହି ଦାୟିତ୍ୱ କେତେଦୂର ପାଳନ ହେଉଛି—ତାହା ନେଇ ଏବେ ଜନମହଲରେ ଚର୍ଚ୍ଚା ଜୋର ଧରିଛି।
୩୦ ବର୍ଷ ଧରି ରାସ୍ତାକଡ଼ରେ ପନିପରିବା ବିକ୍ରି, ମିଳୁନି ସ୍ଥାୟୀ ସୁବିଧା!
କେସିଙ୍ଗା ସହରର ରାସ୍ତାକଡ଼ରେ ଦୀର୍ଘ ପ୍ରାୟ ୩୦ ବର୍ଷ ଧରି ପନିପରିବା ବିକ୍ରି କରି ଜୀବିକା ନିର୍ବାହ କରୁଥିବା ଛୋଟ ବ୍ୟବସାୟୀମାନେ ଆଜି ମଧ୍ୟ ମୌଳିକ ସୁବିଧାରୁ ବଞ୍ଚିତ ବୋଲି ଅଭିଯୋଗ ହେଉଛି। ବର୍ଷା, ଖରା ଓ ଟ୍ରାଫିକ୍ ମଧ୍ୟରେ ବସି ବ୍ୟବସାୟ କରୁଥିବା ଏହି ଗରିବ ବ୍ୟବସାୟୀଙ୍କ ପାଇଁ ଏକ ସୁସଂଗଠିତ ବ୍ୟବସ୍ଥା କରିବାରେ NAC କାହିଁକି ବିଫଳ—ଏହା ଏବେ ବଡ଼ ପ୍ରଶ୍ନ।
ଅନ୍ୟପଟେ, କିଛି ଛୋଟ ଦୋକାନ ଓ ବ୍ୟବସାୟିକ ସ୍ଥାନ ପ୍ରଭାବଶାଳୀ ବ୍ୟକ୍ତିଙ୍କୁ ଦୀର୍ଘମିଆଦି ଲିଜ୍ ଦିଆଯାଉଥିବା ନେଇ ମଧ୍ୟ ଅଭିଯୋଗ ଶୁଣିବାକୁ ମିଳୁଛି। ଯଦି ଏଭଳି ହେଉଛି, ତେବେ ଲିଜ୍ ବଣ୍ଟନର ମାନଦଣ୍ଡ, ଟେଣ୍ଡର ପ୍ରକ୍ରିୟା ଓ ଲାଭାର୍ଥୀ ଚୟନରେ ସ୍ୱଚ୍ଛତା କେଉଁଠି?—ଜନସାଧାରଣ ପ୍ରଶ୍ନ କରୁଛନ୍ତି।
ଟ୍ୟାକ୍ସ ନେବାବେଳେ କଠୋର, ସୁବିଧା ଦେବାବେଳେ ନିରବ?
ନିୟମିତ ଟ୍ୟାକ୍ସ ଦେବାକୁ ଯାଉଥିବା ସାଧାରଣ ଦୋକାନୀଙ୍କୁ ବିଭିନ୍ନ ସମସ୍ୟାର ସମ୍ମୁଖୀନ ହେବାକୁ ପଡ଼ୁଥିବା ଅଭିଯୋଗ ରହିଛି। ଟ୍ୟାକ୍ସ ଆଦାୟ କରିବା NACର ଅଧିକାର ହୋଇପାରେ, କିନ୍ତୁ ଟ୍ୟାକ୍ସ ଦେଉଥିବା ଲୋକଙ୍କୁ ମୌଳିକ ନାଗରିକ ସୁବିଧା ଦେବା ମଧ୍ୟ ପ୍ରଶାସନର ଦାୟିତ୍ୱ ନୁହେଁ କି?
କେତେକ ସ୍ଥାନରେ ଦୋକାନୀମାନେ NAC କର୍ମଚାରୀଙ୍କ ସହ ଦବଙ୍ଗଗିରି କରୁଥିବା ଅଭିଯୋଗ ମଧ୍ୟ ଆସୁଛି। ଯଦି ଏହା ସତ୍ୟ, ତେବେ ଏଭଳି ପରିସ୍ଥିତିକୁ ପ୍ରଶାସନ କାହିଁକି ନିୟନ୍ତ୍ରଣ କରୁନାହିଁ? ଆଉ ଯଦି ଅଭିଯୋଗ ଭିତ୍ତିହୀନ, ତେବେ NAC ପକ୍ଷରୁ ସ୍ପଷ୍ଟୀକରଣ କାହିଁକି ଦିଆଯାଉନାହିଁ?
PMAY ଠାରୁ ସ୍ୱାୟତ୍ତ ଶାସନ ଦିବସ—ସବୁଠି ଚୟନମୂଳକ କାର୍ଯ୍ୟର ଅଭିଯୋଗ
ପ୍ରଧାନମନ୍ତ୍ରୀ ଆବାସ ଯୋଜନା ଭଳି ଜନକଲ୍ୟାଣମୂଳକ ଯୋଜନାରେ ପ୍ରକୃତ ହିତାଧିକାରୀ ଚୟନ ଓ ସ୍ୱଚ୍ଛତା ସବୁଠାରୁ ଗୁରୁତ୍ୱପୂର୍ଣ୍ଣ। ୨୦୨୬ ରେ କେସିଙ୍ଗା NAC ଅଧୀନରେ PMAY-U ୨.୦ ର ୬୬ଟି BLC ପ୍ରକଳ୍ପ ସମ୍ପର୍କରେ ସରକାରୀ ପତ୍ରାଚାର ହୋଇଥିବା ରେକର୍ଡରେ ରହିଛି।
ତେବେ ଏହି ଯୋଜନାର ଲାଭ ପ୍ରକୃତ ଯୋଗ୍ୟ ଲୋକଙ୍କ ପାଖରେ ପହଞ୍ଚୁଛି କି? ହିତାଧିକାରୀ ଚୟନରେ କୌଣସି ମୁହଁଦେଖା ନୀତି ରହୁଛି କି?—ଏହାର ନିରପେକ୍ଷ ତଦନ୍ତ ହେବା ଆବଶ୍ୟକ।
‘ଏହା କାହାର ଦୁର୍ବଳତା?’
କେସିଙ୍ଗା NACରେ ଜନସାଧାରଣଙ୍କ ସମସ୍ୟା ସମାଧାନ ହେବା ବଦଳରେ ଯଦି ବିଭାଗୀୟ ଦୋଷାରୋପ, ପ୍ରଭାବଶାଳୀଙ୍କୁ ସୁବିଧା ଏବଂ ସାଧାରଣ ଲୋକଙ୍କୁ ଅବହେଳା କରାଯାଉଛି, ତେବେ ଏହା ନିଶ୍ଚିତ ଭାବେ ଗମ୍ଭୀର ପ୍ରଶାସନିକ ପ୍ରଶ୍ନ।
ଜନତାଙ୍କ ଟ୍ୟାକ୍ସରେ NAC ଚାଲେ। ତେଣୁ NAC କାହାର ବ୍ୟକ୍ତିଗତ ସଂସ୍ଥା ନୁହେଁ—ଏହା ଜନସାଧାରଣଙ୍କ ସଂସ୍ଥା।
ତେଣୁ ଜିଲ୍ଲା ପ୍ରଶାସନ ଓ ସମ୍ପୃକ୍ତ ଉଚ୍ଚ କର୍ତ୍ତୃପକ୍ଷ ଏହି ଅଭିଯୋଗଗୁଡ଼ିକର ନିରପେକ୍ଷ ତଦନ୍ତ କରି PMAY ହିତାଧିକାରୀ ଚୟନ, ଦୋକାନ ଲିଜ୍ ପ୍ରକ୍ରିୟା, ଟ୍ୟାକ୍ସ ଆଦାୟ, ରାସ୍ତାକଡ଼ ବ୍ୟବସାୟୀଙ୍କ ପାଇଁ ବ୍ୟବସ୍ଥା ଓ ଜନସାଧାରଣଙ୍କ ଅଭିଯୋଗ ନିରାକରଣ ସମ୍ପର୍କରେ ସ୍ପଷ୍ଟ ତଥ୍ୟ ସାର୍ବଜନୀନ କରିବାକୁ ଦାବି ହେଉଛି।
ପ୍ରଶ୍ନ ଉଠୁଛି —କେସିଙ୍ଗା NAC ଜନତାଙ୍କ ପାଇଁ ଚାଲୁଛି, ନା ଜନତାଙ୍କୁ କେବଳ ଦୌଡ଼ାଇବା ପାଇଁ?