ରାମସା ଗ୍ରାମରେ ଗୁରୁଣ୍ଡି ଯାତ୍ରା ପାଳିତ ।

ଝରିଗାଁ,୩୧l୮ (ଷ୍ଟାର ନିୟୁଜ ଓଡିଶା ): ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ପାଲିଆ ପଂଚାୟତ ଅନ୍ତର୍ଗତ ସାନ ରାମସା ଗ୍ରାମର ପିଲାମାନଙ୍କ ଦ୍ୱାରା ଆଜି ଗୁରୁଣ୍ଡି ଯାତ୍ରା ପାଳିତ ହୋଇଯାଇଛି |ଆଷାଢ଼ ମାସରେ ପିଲାମାନେ ଜଙ୍ଗଲରୁ କାଠ ଆଣି ତହିଁରେ ଗୁରୁଣ୍ଡି ତିଆରି କରିଥିଲେ ଓ ରଥଯାତ୍ରାର ପରଦିନ ଠାରୁ ଚଢିବା ଆରମ୍ଭ କରି ଭାଦ୍ରବ ମାସ ଯାଏ ତହିଁରେ ଚଢି ବହୁତ ସାରା ମସ୍ତି କରିଥିଲେ |ଗୁରୁଣ୍ଡିରେ ଚଢି ଗାଁ ଦାଣ୍ଡ ଓ ଗଲି ମାନଙ୍କରେ ଦଳ ଦଳ ହୋଇ ବୁଲିବା ଓ ଗୁରୁଣ୍ଡି ଉପରେ ଚଢି ବିଭିନ୍ନ ପ୍ରକାର କୌଶଳ ପ୍ରଦର୍ଶନ କରିବା ଆଦି ଦେଖିଲେ ବେଶ ଆନନ୍ଦ ଲାଗେ |ସମୟ ସ୍ରୋତରେ ଏହି ସବୁ ଆଞ୍ଚଳିକ ଯାତ୍ରା ସବୁ ହଜିବାକୁ ବସିଥିଲେ ହେଁ,ଝରିଗାଁ ବ୍ଲକର କିଛି କିଛି ଗ୍ରାମର ଯୁବକ ଓ ପିଲାମାନେ ଏହି ଯାତ୍ରାଙ୍କୁ ଜୀବିତ ରଖିଛନ୍ତି |ନୁଆଁଖାଇ ପର୍ବର ବାସୀଦିନ ପିଲାମାନେ ଘର ଘର ବୁଲି ଚାଉଳ, ବିରୀ, କାନ୍ଦୁଲ ଭଳି ଡାଲି ଜାତୀୟ ଶସ୍ୟ ସାଙ୍ଗକୁ ବାଡ଼ିରେ ଥିବା ବିଭିନ୍ନ ପନିପରିବା ସଂଗ୍ରହ କରିବା ସହିତ ତାଙ୍କ ହାବୁଡ଼ରେ ଯାହା ପଦେ ଯଥା:-କୁକୁଡ଼ା, ବତକ, ପାରା ଆଦି ଧରି ଗାଁ ମୁଣ୍ଡରେ ଥିବା ଠାକୁରାଣୀ ମନ୍ଦିରରେ ଯାତ୍ରା କରିଥିଲେ |ସେଠାରେ ମା ଠାକୁରାଣୀଙ୍କ ପୂଜାର୍ଚନା କରିବା ପରେ ଗୁରୁଣ୍ଡି ସବୁକୁ ସେଠାରେ ବିସର୍ଜନ କରି ଭୋଜିଭାତ ଖାଇ ଘରକୁ ଫେରିଥିଲେ |

ନବରଙ୍ଗପୁରରୁ ସ୍ୱତନ୍ତ୍ର ପ୍ରତିନିଧି ସବ୍ୟସାଚୀ ଭରତିଆଙ୍କ ରିପୋର୍ଟ |